ALIYOSEMA MKUU WA MKOA SONGWE CHIKU GALLAWA KATIKA ZIARA YAKE WILAYA YA SONGWE.

Posted on: April 9th, 2018

•  Pato la Mwananchi wa Songwe kwa mwaka ni laki nane na nusu, tunataka kufikia 2020 ifikie milioni 3 na kufikia 2025 ifikie milioni 7.
• Malengo haya sio maneno lazima tufanikiwe hivyo Mkurugenzi wa Halmashauri ya Wilaya ya Songwe ahakikishe anaweka mikakati ya haraka na inayotekelezeka pamoja na kuteua timu itakayofanikisha kufikika malengo hayo.
• Mkoa wa Songwe ni Mkoa wenye fursa na utajiri mwingi pamoja na watendaji tulionao wana akili nyingi tu tatizo wameshindwa kuzitumia vizuri kwa ajili ya kubuni maendeleo ya wananchi wetu.
• Mtumishi wa umma asiyetekeleza majukumu yake ni sawa na mwizi anayeiibia serikali fedha kwakuwa analipwa mshahara kwa kazi ambayo hajaifanya, hivyo Mkurugenzi wa Songwe aingie Mkataba na wakuu wa idara, waonyeshe mipango yao ya kazi itakayoleta maendeleo na endapo watashindwa kutekeleza yaliyomo kwenye mikataba yao basi hao hawatufai, watupishe.
• Mfumo wa upimaji wa utendaji wa watumishi kwa kutumia Opras bado haujaleta tija ndio maana tunataka mikataba ambayo itaondoa mazoea ya kuwa kazi za serikalini ni za kudumu bali tunaangalia utendaji wenye tija.
• Hakuna mtumishi yeyote kutoka nje ya kituo cha kazi bila ruhusa ya Mkurugenzi, tunataka nidhamu katika utumishi wa umma kwakuwa maendeleo hayawezi kuja bila ya kuwa na nidhamu.
• Timu ya kuhakikisha viwanda vinaundwa ijumuishe afisa Maendeleo ya jamii, afisa biashara, afisa uwekezaji na Afisa Vijana, hawa wakifanya kazi yao vizuri tutafikia uchumi wa viwanda.
• Timu hiyo itembelee vikundi vyote, vikundi vyenye mwelekeo wa kuwa na viwanda viwezeshwe kwa kuandaliwa andiko la mradi, semina na mafunzo ya ushirika, masoko na mikopo itakayokuza mitaji yao na kuviwezesha vikundi kuanzisha viwanda.
• Mikopo itakayotolewa kwenye vikundi iwe msaada wa kukuza vikundi hivyo na sio kuviongezea madeni, timu hiyo isikae ofisini itembelee kila kikundi.
• Mkurugenzi atenge eneo la viwanda, lipimwe pamoja na kuhakikisha miundombinu muhimu kama umeme inafika eneo hilo ili wajasiriamali na wenye vikundi wote ambao wana viwanda wawe katima eneo linalotambulika.

Wakuu wa Idara wa halmashauri ya Wilaya ya Songwe wakimsikiliza Mkuu wa Mkoa wa Songwe Chiku Gallawa alipokuwa akizungumza nao kabla hajaanza ziara.