MKUU WA WILAYA YA ILEJE MHE. FARIDA MGOMI KWA NIABA YA MKUU WA MKOA AFUNGUA HUDUMA YA WIKI YA SHERIA MKOANI SONGWE

Posted on: January 25th, 2025

Mkuu wa Wilaya ya Ileje Mhe. Farida Mgomi kwa niaba ya Mkuu wa Mkoa wa Songwe, amewataka watumishi wa mahakama mkoani humo kujiepusha na vitendo vya uonevu, akisisitiza kuwa haki na usawa ni misingi muhimu katika kuimarisha amani na mshikamano wa kijamii.

Kauli hiyo ilitolewa leo, Januari 25, 2025, kupitia mwakilishi wake, Mkuu wa Wilaya ya Ileje, Mhe. Farida Mgomi, wakati wa uzinduzi wa Wiki ya Sheria nchini, ambapo kwa Mkoa wa Songwe, maadhimisho hayo yamefanyika katika viwanja vya Stendi ya Malori, mjini Vwawa, wilayani Mbozi.

Akisoma hotuba ya Mkuu wa Mkoa, Mhe. Mgomi alisisitiza kuwa watumishi wa mahakama wanapaswa kutekeleza majukumu yao kwa uadilifu wa hali ya juu, wakizingatia misingi ya haki, usawa, na utawala bora. Aliongeza kuwa nidhamu ya hali ya juu ni nyenzo muhimu ya kujenga imani ya wananchi katika mfumo wa utoaji haki.

Aidha, aliwaasa wananchi kuepuka tabia ya kuchukua sheria mkononi na badala yake kufuata taratibu za kisheria pale wanapokutana na changamoto mbalimbali za kisheria."