DKT. TULIA KUZINDUA UNUNUZI WA TIMU YA SOKA YA MKOA WA SONGWE

Posted on: March 5th, 2020

  Naibu Spika wa Jamhuri ya Muungano wa Tanzania Dkt Tulia Ackson anatarajiwa kufanya uzinduzi wa Line maalumu itakayotumika kuchangia ununuzi wa timu ya Mpira wa Miguu inayocheza ligi kuu itakayomilikiwa na Mkoa wa Songwe.

Katibu Tawala Mkoa wa Songwe David Kafulila amesema uzinduzi huo unatarajia kufanyika Jumamosi Machi 07, 2020 katika Ukumbi wa Mpende Jirani ulioko Vwawa Wilaya ya Mbozi.

Kafulila amesema uchangiaji huo utawafanya wananchi kuwa sehemu ya wamiliki wa timu hiyo kwani unapochangia unakuwa umenunua hisa ambayo hisa moja ni shilingi elfu moja na kima cha chini cha hisa ni hisa kumi.

Ameongeza kuwa matarajio ya Mkoa ni kuwa timu hiyo itasaidia kukuza vipaji vya vijana hususani kwa wanafunzi wa sekondari wanao shiriki mashindano ya Umiseta waliopo Mkoa wa Songwe ambao wanafanya vizuri katika Soka pia timu hiyo itaweza kuongeza ajira.

Kafulila amesema hapo zamani kulikuwa na timu ya mpira wa miguu ambayo ilifanya vizuri Wilaya ya Mbozi hivyo ni wakati sasa wa kuwa na timu nyingine ambayo itasaidia kukuza vipaji na kuutangaza Mkoa wa Songwe.

Ameongeza kuwa wananchi wote na wadau wa michezo wafike siku ya uzinduzi kwani kutakuwa na majadiliano na taarifa mbalimbali zitatolewa ili kuwezesha Mkoa kumiliki timu ya mpira wa miguu.