RC MWANGELA ATOA SIKU 14 TANESCO KUKAMILISHA LAINI KUU YA UMEME SONGWE

Posted on: April 1st, 2021

Mkuu wa Mkoa wa Songwe Brig. Jen. Nicodemus Mwangela ametoa siku 14 kwa kampuni Tanzu ya TANESCO, ETDCO kukamilisha ujenzi wa laini kuu ya umeme Mkoani hapa.

Brig. Jen. Mwangela ametoa agizo hilo wakati akifanya ziara ya ukaguzi wa laini kuu ya umeme inayojengwa kutoka Kituo cha Umeme Iyunga Mkoa wa Mbeya hadi Selewa Mbozi katika kituo cha kutawanyia umeme kwa Mkoa wa Songwe.

Ujenzi wa laini hiyo ulitakiwa kukamilika Machi 31 kwa kumjibu wa mkataba ili kuondoa kero ya umeme kukatika mara kwa mara Mkoani Songwe.

"Nimeongea na Meneja wa ETDCO na kumueleza juu ya umuhimu wa kukamilika haraka kwa mradi huu ndani ya siku 14 na ameniahidi atafanya hivyo.”, Brig. Jen. Mwangela.

Aidha ameagiza kuongezwa kwa wafanyakazi ili mradi ukamilike ndani ya siku 14 licha ya kuwa hadi sasa baadhi ya mafundi wanaendelea na kufunga nyaya kwenye laini kuu na wamefika eneo la Nanyala wakitokea Mbozi.

Ziara ya Mkuu wa Mkoa inafanyika ikiwa ni kufuatilia utekelezaji wa mradi huo ambapo Mkuu wa Mkoa  aliambatana na Kamati yake ya Ulinzi na Usalama.